Wararka ka imaanaya dalka Itoobiya, ayaa ku waramaya in dhul go’ xoogan oo khasaare geystay uu ku dhuftay deegaanno katirsan dalka Itoobiya.
Dhul go’an ayaa ka dhacay wuqooyiga magaalada Gondar ee ismaamulka Amxaarada, waxaana ku dhintay tiro Itoobiyaan ah, halka ay jiraan dad kale oo waxyeello kasoo gaartay.
Warbaahinta maxalliga ee kasoo waranta gobolka Amxaarada, ayaa soo tabiyay in ugu yaraan 23 ruux oo Itoobiyaan ah ku dhinteen dhul go’an, halka ay ku dhaawacmeen tiro dad ah, waxaana intaa dheer khasaaraha hantiyadeed ee ka dhashey dhul go’an.
Waxaa burburay ugu yaraan 1775 hektar oo ay dalagyo kala duwan ku abuurnaayeen, halka ay guryahooda ka barakaceen kudhawaad 3000 oo ruux, waxaana jira guryo gaaraya illaa 48 guri oo dumay.
Labo maalin kahor ayay ahayd markii dhul go’ midkan lamid ah uu ka dhacay wuqooyiga Itoobiya ee ismaamulka Tigrey, waxaana halkaas ku dhintay ugu yaraan 10 ruux, iyadoo weli la la’yahay 6 ruux.
Bishii lasoo dhaafay ayay ahayd markii dhul go’ kuwan lamid ah uu ku dhuftay koonfurta dalka Itoobiya, kaasoo ay ku dhinteen ugu yaraan 260 ruux, halka ay ku barakaceen inkabadan 15 kun oo dad ah.