Wararka ka imanaya dalka Nayjeeriya ayaa sheegaya in ugu yaraan 86 qof ay ku dhinteen qarax ka dhashay booyad shidaal, isla markaana ku dhaawacmeen tobonaan qof oo kale, sida ay shaacisay hey’adda gurmadka deg-dega ah ee dalkaasi.
Booyaddan xamuulka ah oo wararku sheegayaan in ay sidday shidaal gaaraya 60 Kun oo litir ayaa qaraxday kadib markii ay sabtidii ku geddoontay isgoyska Dikko ee jidka xiriiriya caasimadda Abuja iyo magaallada waqooyiga ku taalla ee Kaduna.
Ilo-wareedyo ayaa sheegaya in khasaarahan baaxadda leh uu ka dhashay kadib markii dad kusoo xoomay iskuna dayay inay shidaalka ka wareejiyaan booyadda rogmatay uu dab qabsaday, kaas oo geesta kalena burburiyey 15 dukaan, sida ay sheegeen maamulka gurmadka deg-degga ah ee dalkaasi.
Kumar Tsukwam, oo ah taliyaha qaybta gobolka Niger ee Hay’adda Nabadgelyada Waddooyinka ee Federaalka, ayaa isna sheegay in dadku ay ku yaaceen booyadda si ay u soo qaataan batroolka daatay kadib markii uu rogmaday baabuurku.
Xuseen Ciisa oo ka tirsan Hay’adda Maareynta Degdegga ah ee Qaranka ayaa u sheegay Associated Press in 55 qof oo dheeraad ah ay ku dhaawacmeen kuwaas oo lagu daweynayo saddex cisbitaal oo kala duwan oo ku yaal agagaarka Suleeja ee gobolka Niger.
Bishii Oktoobar ee 2024, in ka badan 170 qof ayaa ku dhintay shil kan la mid ah oo ka dhacay gobolka Jigawa, ee waqooyiga Nigeria. Iyadoo shilalka noocaan oo kale ah ay wax caadiya ka noqdeen Nayjeeriya oo ah dalka ugu badan ee soo saara saliidda Afrika.
Qiimaha Shidaalka ee Naygjeeriya ayaa kor u kacay in ka badan 400 boqolkiiba tan iyo markii Madaxweynaha dalkaasi Murtad Bola Tinubu uu meesha ka saaray kabka tobanaan-sano-jirsaday markii uu xafiiska yimid May 2023. Taas oo keentay keentay in dad badan ay naftooda halis geliyaan si ay shidaal uga helaan/dhurtaan booyadaha shidaalka ee shilallka gala.