Inta la xaqiijiyay ugu yaraan laba xubnood oo dhalinyaro Soomaaliyeed ah ayaa siyaabo kala duwan loogu dilay magaalooyinka ugu waawayn ee dalka Koonfur Africa, kaddib markii ay la kulmeen weeraro burcadnimo ah.
Goobjoogeyaal dalkaasi ku sugan ayaa soo sheegay in labada wiil oo ka mid ahaa Soomaalida halkaas shaqooyinka u tagay habeenkii xalay lagu kala dilay magalooyinka Pretoria Iyo Cape Town, oo ka mid saddexda caasimadood ee uu dalkaasi leeyahay.
Mid ka mid ah dhalinyarada Soomaaliyeed ee la dilay oo magaciisa lagu sheegay Cabdifataax Caana-nuug ayaa xalay saq-barkii si gaar ah loogu dilay xaafadda ay Soomaalidu ku badan tahay ee magalada Pretoria ee lagu magacaabo Pretoria West, sida ay faafiyeen Soomaalida dalkaasi ku dhaqan si rasmi ah looma xaqiijin sababta keentay dilkiisa iyo sidoo kale kooxihii ka dambeeyay.
Qofka labaad ee la dilay ayaa magaciisa lagu sheegay cabdiraxman nuur, kaasi oo burcad hubeysan ay ku dileen goobtiisa ganacsiga oo kutaallay deegaan lagu magacaabo mfuleni ee hoostaga magalada cape Town ee waddanka Koonfur Africa.
Maalmo uun ka hor ayay ahayd markii kooxaha hubeysan oo burcad Koonfur Afrikaanka ay dilal iyo dhaawac u gaysteen ganacsato iyo sidoo kale wade baabuur oo Soomaali ah.