Aroornimadii hore ee saaka waxaa markale deegaanka Dacawaley ee hoostaga degmada Xarshin ka qarxay dagaal xoogan oo u dhaxeeya dadka deegaanka iyo maleeshiyada Liyuu booliska ee ay dhisatay dowladda xabashida Itoobiya.
Ilo wareedyo deegaanka ah ayaa soo sheegay in dagaalku yimid, kaddib markii maleeshiyada Liyuu boolisku ay dhowr jiho kasoo weerareen deegaanka Dacawaley, ilaa afar jiho ayay wararku sheegayaan inay xabadda kasoo billaabeen Liyuu boolisku.
Wararku waxay intaas ku darayaan in maleeshiyada Liyuu boolisku jareen waddooyinka soo gala deegaanka Dacawaley ee ay dagaalladu ka dhaceen, mana jiro faahfaahin rasmi ah oo ku aaddan khasaaraha ka dhashay dagaalka.
Dagaalka maanta dib u qarxay ayaa daba socda dagaallo culus oo deegaankaasi ku dhexmaray dadka shacabka iyo maleeshiyada Liyuu booliska, kadib markii dadka deegaanka ka gadoodeen xasuuq maleeshiyada Liyuu boolisku kula kaceen dadka shacabka ah ee deegaankaasi ku dhaqan.