Wararka ka imanaya dalka Congo ayaa sheegaya in dhaq-dhaqaaqa fallaagada M23 ay waaberigii hore ee saaka la wareegeen magaallada muhiimka ah ee Goma, sida lagu sheegay war-saxaafadeed ay fallaagadu soo saartay.
Fallaagada M23 oo gacan-saar la leh Rwanda ayaa Axaddii shalay la wareegtay duleedka magaallada Goma ee ugu weyn bariga dalka Koongo, tallaabadaas oo waxa loogu yeero Qaramada Midoobay ku tilmaantay argagax ballaaran oo soo food-saaray ilaa labo milyan oo ruux oo ku nool aagaggaasi, isla markaana Kumanaan qof ay durbaba bilaabeen inay guryahooda ay ka cararaan.
Xukuumadda Kaafiradda ah ee Congo, ayaa sabtidii lasoo dhaafay xiriirka u jartay Rwanda, oo ay ku eedaysay inay diidday joojinta taageerrada ay siiso fallaagada M23. Waxaana bayaan kasoo baxay afhayeenka xukuumadda Congo, lagu sheegay in dalku uu galay xaalad dagaal, isagoo ku baaqay in la ilaaliyo dadka rayidka ah.
Kooxda M23 oo ah fallaago kasoo hor-jeedda dawladda Koongo, kana hawl-gasha bariga dalkaasi ayaa todobaadyadii lasoo dhaafay guullo la taaban karo ka gaartay xuduudka Congo ay la wadaagto Rwanda, ka dib markii ay fashilmeen isku-dayo la rabay in lagu xasiliyo deggaannadaasi.
Mucaaradka M23 ayaa habeennimadii Axadda ugu baaqday ciidamada Kongo inay hubkooda kusoo dhiibaan 48 saac gudahood, subaxda horena iska soo xaadiriyaan garoonka maxalliga ah ee kubbadda cagta, iyagoo bulshada reer Goma-na ugu baaqay inay is-dejiyaan.
Rabshadahan oo muddooyinkan dambe isa soo taraayay ayaa sii kordhay usbuucii lasoo dhaafay kadib markii la dilay 13 askari oo ka tirsan ciidanka hawl-galka waxa loogu yeeray nabad ilaalinta Qaramada Midoobay.
Shalay ayay ahayd markii bayaan ay soo saareen ciidanka Urugwaay oo qayb ka ah hawl-galka QM ee deggaannadaasi ay shaaciyeen in qaar ka mid ah askarta Congo ay dhigeen hubkoodii.
Sawirro la socday war-murtiyeedka ay soo saareen ciidanka Uruguaw, ayaa lagu arkayaa rag hubeysan oo iska diiwaan-gelinaya hoggaannada dhaqanka kuna labisan dareyska ciidamada iyo kuwa rayidka.
Wasiirka arrimaha dibadda ee Congo ayaa u sheegay Qaramada Midoobay in Rwanda ay waddo daandaansi dagaal iyo gardarro hor leh. Halka safiirka Rwanda u fadhiya Q.M, oo aan xaqiijin isla markaana aan beenin sheegashada Congo, uu isna eedeyn u jeediyay dowladda Congo, isagoo sheegay in dhibaatada laga hor-tagi karay haddii ay muujin lahayd go’aan dhab ah oo nabadeed.
Dalka Congo oo hodan ku ah khayraad badan ayaa waxaa horey uga dhacay dagaalladii ugu xumaa uguna dhiig-daadinta badnaa taariikhdan casriga ah, kuwaas oo la sheegay inay qaarkood ku dhinteen dad ka bdan 5 Milyan oo ruux oo u geeriyooday sababo ay ka mid yihiin Macaluul, Cudurro iyo dhibaatooyin kale oo la xiriira colaadahaasi.